Kodi i ri Penal sjell ndryshime të rëndësishme që lidhen me sigurinë ushqimore, duke parashikuar dënime më të ashpra për prodhimin, tregtimin dhe mashtrimin me produktet ushqimore që rrezikojnë shëndetin e konsumatorëve.

Sipas nenit 458, kushdo që prodhon, përpunon, ruan, tregton, importon ose eksporton ushqime dhe pije në kundërshtim me standardet ligjore, si dhe përdor kimikate ose lëndë të ndaluara te kafshët dhe bimët që shërbejnë për konsum, do të dënohet me burg nga gjashtë muaj deri në katër vjet.

Një tjetër dispozitë e re lidhet me ofrimin e ushqimit të pasigurt, që përfshin therjen e kafshëve ose përdorimin e produkteve shtazore për konsum, duke ditur se ato janë trajtuar me substanca të ndaluara. Për këtë shkelje, parashikohet deri në katër vjet burg. Gjithashtu, penalizohet hedhja në treg e mishit apo produkteve shtazore pa respektuar periudhat e pritjes të përcaktuara nga ligji.

Sipas nenit 460, është sanksionuar edhe mashtrimi me produktet ushqimore. Kushdo që importon, prodhon, falsifikon, ruan, reklamojnë ose tregton ushqime me të dhëna të rreme për cilësinë, prejardhjen, kategorinë apo përbërjen e tyre, rrezikon deri në tre vjet burgim.

Po ashtu, paraqitja e rreme e produktit ushqimor, si ndryshimi i datës së skadencës ose i përbërjes së produkteve, apo tregtimi i ushqimeve që duhej të bëheshin të papërdorshme, dënohet me deri në gjashtë muaj burg.

Ndërkohë, Kodi i ri parashikon edhe kriminalizimin e prishjes së shenjave të autoriteteve shtetërore. Heqja ose ndryshimi i shenjave bllokuese të vendosura nga Autoriteti Kombëtar i Ushqimit (AKU), si dhe vazhdimi i aktivitetit pavarësisht bllokimit, mund të sjellë deri në tre vjet burg.

Me këto ndryshime, autoritetet synojnë rritjen e kontrollit, sigurinë e konsumatorëve dhe ndëshkimin e abuzimeve në tregun ushqimor.