Komisioni Evropian ka nisur një proces konsultimi publik mbi një listë të gjerë produktesh amerikane që mund të përballen me kundërmasa nga Bashkimi Evropian, nëse negociatat me Shtetet e Bashkuara për çështjet tarifore nuk sjellin një zgjidhje reciproke dhe të dobishme për palët.

Lista përfshin importe amerikane me vlerë 95 miliardë euro, duke përfshirë produkte industriale dhe bujqësore, ndërsa shqyrton edhe kufizime të mundshme për eksportet evropiane të çelikut dhe kimikateve në SHBA, me një vlerë prej 4.4 miliardë euro. Tarifat që mund të shqyrtohen nga BE përfshijnë gjithashtu ato mbi makinat dhe pjesët e makinave.

Komisioni Evropian ka theksuar se, megjithëse ka si prioritet arritjen e një marrëveshjeje të balancuar përmes negociatave, është i përgatitur të marrë kundërmasa nëse bisedimet me SHBA-në nuk japin rezultat. Komisioni ka quajtur tarifat amerikane “të pajustifikuara dhe të dëmshme” për ekonominë evropiane.

Në të njëjtën kohë, BE-ja ka njoftuar se do të nisi një ankesë zyrtare në Organizatën Botërore të Tregtisë (WTO) kundër SHBA-së, duke i akuzuar për shkelje të rregullave ndërkombëtare në vendosjen e tarifave universale.

Presidentja e Komisionit Evropian, Ursula von der Leyen, theksoi se BE mbetet e përkushtuar ndaj zgjidhjes përmes dialogut, duke shtuar: “Ne besojmë në marrëveshje që sjellin përfitime për konsumatorët dhe bizneset në të dy anët e Atlantikut, por do të jemi të përgatitur për çdo skenar.”