Ish kryeministri, Sali Berisha ka marrë pjesë sot në konferencën e organizuar në kuadër të zgjedhjeve vendore e cila mbështetet nga Fondacioni “Hjarl Hjalmarson” i partisë simotër suedeze “Moderaterna”.

Berisha tha se PD ndodhej në momentin më të vështirë ndërsa, theksoi se kishte tre mandate në opozitë jo si shkak i alternativës së qeverisë por si pasojë të dobësosë së partisë.

Sali Berisha: Partia Demokratike ndodhet në momentin e saj më të vështirë që mund të përshkruhet. Ne jemi në mandatin e tretë në opozitë dhe kjo absolutisht jo për merita të qeverisë por për dobësinë e opozitës. Sepse ne këtu, kemi patur dhe kemi një qeveri e cila mund të përmblidhet me dy fjalë “qeveri e bazuar në skandale”. Ky udhëtim i opozitës në këto vite, ka qenë një udhëtim topitës në një mënyrë ose në një tjetër për fatin më të keq si asnjëherë në këto 30 vite, dora e qeverisë u shtri mbi opozitën. Tek shqiptarët u krijua përshtypja se Edi Rama është i pamundshëm dhe se opozita i bën fresk atij. Në këtë kontekst, partia Demokratike ndodhej para alternativës “të ekzistonte apo të shkrihej”. Por unë mendoj se ajo duhet të ekzistonte sepse mbi 620 mijë shqiptarë, e votuan në zgjedhjet e fundit, por që ajo të ekzistonte duhet të ndryshonte në mënyrë rrënjësore, të paraqitej para shqiptarëve si një parti të rësisht e ndryshuar, përndryshe ata nuk kanë asnjë arsye të na besojnë. Në një vit me përpjekje të jashtëzakonshme, ne ia kemi dalë, kemi shënuar arritje substanciale për t’u paraqitur si parti e ndryshuar para shqiptarëve.