Në orën 11:00 nis Kongresi i Partisë Socialiste ku do të zgjidhen 156 nga 350 anëtarë të Asamblesë Kombëtare, me 3/4 e tyre që pritet të jenë anëtarë të rinj. Anëtarët e tjerë janë automatikisht pjesë e Asamblesë për shkak të funksioneve të tyre si kryetarë të Kuvendit, deputetë, ministra dhe kryetarë bashkish.

Diskutimet në panele do të ndahen në tre fusha kryesore:

1.Mirëqeverisja: Eksponentë brenda qeverisë dhe partisë do të mbajnë fjalime dhe do të diskutojnë për përmirësimin e qeverisjes dhe rritjen e efikasitetit të administratës publike.

2.Antikorrupsioni: Diskutimet do të fokusohen në masat dhe strategjitë për luftimin e korrupsionit, për të siguruar një administratë transparente dhe të ndershme.

3.Punët e Brendshme të PS: Në këtë fushë, në fokus do të jetë procesi i rienergjizimit të partisë dhe turet me shqiptarët jashtë vendit, për të përforcuar lidhjet dhe mbështetjen nga diaspora.

Ky kongres do t’i shërbejë Partisë Socialiste edhe për nisjen e procesit të përzgjedhjes së kandidatëve për deputetë për zgjedhjet parlamentare të vitit 2025, siç u njoftua nga kryeministri Edi Rama në asamblenë e muajit qershor.