Konsumi i kokainës në Greqi ka pësuar një rritje të ndjeshme gjatë viteve të fundit, sipas analizave të ujërave të zeza urbane në Athinë. Gjetjet sugjerojnë se grekët konsumojnë afërsisht një gjysmë ton kokainë çdo vit, me një rritje të vazhdueshme që nga viti 2020. Konsumi i kokainës është veçanërisht i lartë gjatë periudhave festive si Krishtlindjet, Viti i Ri, dhe festivaleve muzikore verore, kur konsumi ditor arrin deri në 3 kg kokainë, dyfishuar nga niveli i zakonshëm.

Profesori i Kimisë Analitike, Nikos Thomaidis, ka theksuar se analiza e ujërave të zeza është një metodë e qëndrueshme dhe efektive për të monitoruar përdorimin e substancave narkotike. Ai nënvizon se pandemia e COVID-19 ka bërë më të lehtë aksesin në kokainë, duke pasqyruar një fenomen që po përhapet në të gjithë Europën. Në vitin 2010, përdorimi i kokainës ishte rreth 0.47 kg/ditë, ndërsa në vitin 2023 kjo shifër ka arritur në 1.11 kg/ditë.

Thomaidis gjithashtu shpjegon se përdorimi i kokainës dhe substancave të tjera si ekstazi dhe kanabis rritet ndjeshëm gjatë periudhave festive për shkak të konsumit më të lartë. Ky fenomen ka ndodhur pas përmirësimit të furnizimit me kokainë, që ka lehtësuar aksesin për përdoruesit.