Kontrata 1.4 milion euro e ish-kryeministrit Sali Berisha me strategun amerikan Chris LaCivita pritet të kalojë në sitën e audituesve të Komisionit Qendror të Zgjedhjeve. Auditimi do të përfshijë gjithashtu deklarimet financiare të Partisë Socialiste dhe të gjithë subjekteve që morën pjesë në zgjedhjet parlamentare të 11 majit.

“Është ende herët për të komentuar se sa dhe si kanë shpenzuar partitë politike në fushatë. Duhet analizë. Ne do të bëjmë auditim në KQZ për të parë se si janë përdorur këto para dhe burimet e financimit të partive politike,” – deklaroi kreu i KQZ-së, Ilirjan Celibashi.

Në këtë fazë, Celibashi ka vëmendjen tek procesi zgjedhor i së dielës, që do të mbahet në pesë bashki të vendit, pasi Gjykata Kushtetuese anuloi zgjedhjet e pjesshme në Tiranë, duke lënë në detyrë kryebashkiakun Erion Veliaj.

“Nuk e di, askush nuk e di nëse dhe kur do të mbahen zgjedhjet në Tiranë. Ajo që dihet është se më datën 9 nëntor do të mbahen zgjedhje në pesë bashki. Vendimi i Gjykatës Kushtetuese është i qartë dhe ne jemi të detyruar ta zbatojmë,” – shtoi ai.

Të dielën, qytetarët e Vlorës, Tepelenës, Cërrikut, Matit dhe Beratit do t’i drejtohen kutive të votimit për të zgjedhur kryebashkiakun e ri. KQZ ka testuar tashmë pajisjet e identifikimit elektronik dhe është shprehur se procesi është gati për zhvillim normal në të gjitha këto bashki.