Një ngjarje e rëndë ka tronditur sot Korçën. Një vajzë e mitur është hedhur nga kati i tretë i një pallati në lagjen 14, duke përfunduar e plagosur rëndë. Aktualisht, ajo ndodhet në spital, nën kujdesin e mjekëve.
Jashtë kamerave, nëna e saj ka bërë një deklaratë tronditëse. Ajo rrëfen se vajza ishte prej kohësh viktimë e bullizimit dhe dhunës nga bashkëmoshatarët në lagje.
“Burrin e kam në burg për dhunë në familje, kam katër fëmijë. Vajzën e madhe ma kanë rrahur, edhe vajzën e dytë. Para dy ditësh e ka goditur një vajzë në kurriz. Sot prapë e provokuan. Më goditën dhe mua në stomak, më morën në polici. Kur isha në polici, çupa u hodh nga kati i tretë. U hodh se e tallnin, i thoshin që ‘mamin ta morën në polici, jeni fshatarë’. Merrni masa se nuk më lënë rehat”, u shpreh ajo.
Policia po heton rrethanat e ngjarjes, ndërsa rasti ka ngritur shqetësime të forta për fenomenin e bullizimit dhe pasojat dramatike që ai mund të sjellë tek fëmijët.
