Një ngjarje e rëndë ka ndodhur mbrëmjen e 31 gushtit 2025 në një lokal pranë parkut të Korçës, ku 54-vjeçari Dritan Pine ka plagosur me thikë Mihal Zhidron dhe Sotiraq Shkurtin. Ai akuzohet për “Vrasje me dashje, mbetur në tentativë”, “Plagosje të rëndë dhe të lehtë me dashje”, “Shkatërrim prone”, “Deklarim të rremë para policisë”, “Prishje të qetësisë publike” dhe “Prodhim, mbajtje, blerje ose shitje pa leje të armëve të ftohta”.

Sherri nisi fillimisht si përplasje verbale mes dy grupeve dhe u agravua me hedhje karrigesh dhe përdorim shkopash bejsbolli. Numri i personave të arrestuar ka shkuar në 10 dhe përfshin Dritan Pine, Petrika Ropi, Ilir Shukulli, Rafail Kocaqi, Salvi Asllan, Mihal Zhidro, Serxhio Mema, Gersi Dervishi, Sotiraq Shkurti dhe Kristi Lamçe. Të arrestuarit kanë dhënë deklarata të rreme gjatë marrjes në pyetje.

Policia ka shpallur në kërkim një 38-vjeçar, me inicialet E.K., i dyshuar si pjesëmarrës në konflikt. Motivi i sherrit nuk është ende i qartë, por policia shprehet se është “banal”, ndërsa të gjithë të përfshirët ishin nën efektin e alkoolit.