Komisioni Qendror i Zgjedhjeve ka bërë të ditur se plot 104 subjekte politike kanë dorëzuar aplikimet për të marrë pjesë në zgjedhjet lokale të 12 tetorit.

Në garë janë regjistruar 33 parti politike, 2 koalicione, 35 kandidatë të pavarur dhe 34 iniciativa qytetare që do të konkurrojnë për postet e kryetarëve dhe këshilltarëve lokalë në 38 komuna të Kosovës.

Procesi i aplikimit u mbyll mesnatën e së mërkurës, ndërsa deri tani janë certifikuar vetëm 19 subjekte – 6 iniciativa qytetare dhe 13 kandidatë të pavarur. KQZ paralajmëron se për shkak të periudhës së pushimeve dhe afatit të ngushtë të aplikimeve, verifikimi i kandidatëve do të zgjasë më shumë se zakonisht.

“Rreth 90% e subjekteve politike kanë përfunduar aplikimin në minutat e fundit, ndaj shumica e kandidatëve do të kalojnë tani në procesin e verifikimit nga institucionet përkatëse,” – tha Besnik Buzhala nga KQZ.

Ndër aplikuesit bie në sy Lista Serbe, partia më e madhe e komunitetit serb në Kosovë, e mbështetur nga Beogradi, e cila në vitin 2023 kishte bojkotuar zgjedhjet lokale në komunat veriore.