Në një seancë të jashtëzakonshme të Kuvendit të Kosovës, e cila u zhvillua mbrëmjen e së enjtes (05.03.), dështoi zgjedhja e presidentit për shkak të mungesës së kuorumit. Kryetarja e Kuvendit, Albulena Haxhiu, u detyrua ta ndërpresë seancën menjëherë pas nisjes, pasi vetëm 66 deputetë të shumicës ishin të pranishëm, ndërkohë që opozita e bojkotoi plotësisht procedurën.

“Me këtë rast nuk ka kuorum për të vazhduar më tutje me votimin. Disa herë i bëra apele deputetëve të cilët mungojnë që të vijnë dhe të jenë të pranishëm në përputhje me Kushtetutën dhe aktgjykimet e Gjykatës Kushtetuese. Situata është që ata nuk janë të pranishëm. Rrjedhimisht nuk i kemi 2/3 e deputetëve,” tha Haxhiu.

Dy kandidatët e propozuar për postin e presidentit ishin Glauk Konjufca dhe Fatmire Kollçaku, të dy nga Lëvizja Vetëvendosje.

Pas ndërprerjes së seancës, Vetëvendosje iu drejtua Gjykatës Kushtetuese të Kosovës për të vlerësuar kushtetutshmërinë e procedurës dhe kërkoi vendosjen e një mase të përkohshme për pezullimin e afatit kushtetues lidhur me zgjedhjen e Presidentit, deri në publikimin e aktgjykimit.

Sipas njohësve të Kushtetutës, afati për zgjedhjen e presidentit skadon mesnatën e së enjtes, çka bën situatën në Kuvend të Kosovës kritike dhe të pasigurt për vijimësinë e procesit.