Në Shqipëri, Kolegji Zgjedhor përcaktoi modelin përfundimtar të fletës së votimit që do të përdoret në zgjedhjet e 25 Prillit, ndërsa koha e shkurtër në dispozicion rrezikon të vërë në pikëpyetje serioze prodhimin e tyre.

Mbrëmjen e së dielës, Kolegji miratoi modelin sipas të cilit në fletën e votimit nuk do të shënohen emrat e kandidadatëve të secilës parti, por vetëm numrat sipas renditjes së paraqitur nga partitë që i kanë propozuar.

Të enjten që shkoi Komisioneri Shtetëror i Zgjedhjeve miratoi një tjetër fletë votimi, ku kandidatët identifikoheshin me emrat dhe mbiemrat e tyre. Celibashi tha të enjten se identifikimi i kandidatëve me emrat e tyre e lehtësonte procedurën e zgjedhjes nga votuesit.

Socialistët e kundërshtuan, duke mbështetur idenë se një fletë e tillë, veçanërisht në Tiranë, do të ishte jo vetëm e komplikuar për zgjedhësit, por do të vështirësonte dhe fazën e numërimit të votave.

Kolegji Zgjedhor, la në fuqi të njejtin vendim, duke mbyllur kështu debatet mbi këtë temë.