Kreu i SPAK, Altin Dumani, gjatë raportimit në Komisionin e Ligjeve, u pyet në lidhje me publikimin e çështjeve sensitive që po hetohen nga SPAK. Dumani theksoi se publikimi i informacioneve të tilla është i ndaluar dhe përgjegjësia për zbatimin e vendimeve të gjykatës bie mbi të gjithë, përfshirë median. Ai shtoi se brenda institucionit po bëhen përpjekje për të ndaluar rrjedhjen e informacionit dhe se është arritur një reduktim i ndjeshëm në këtë drejtim.

“Ne hetimet sensitive kërkojmë ndalimin e publikimit të kërkesës sonë për masë sigurimi apo edhe gjykata vetë vendos ndalimin e publikimit. Ngelet në përgjegjësinë e secilit duke nisur nga media për të zbatuar një vendim gjykate. Ndalohet publikimi! Është një moment i vështirë, nga brenda përpiqemi që ta ndalojmë, ka një reduktim të madh të rrjedhjes së informacionit nga SPAK. Është çështje delikate,” tha Dumani.