Gjatë një seance në Komisionin e Ligjeve, kreu i SPAK, Altin Dumani, u pyet nga deputeti i PD-së, Enkeljed Alibeaj, lidhur me perceptimin publik se hetimet e SPAK godasin vetëm opozitën dhe jo pozitën, veçanërisht kryeministrin Edi Rama.

Alibeaj shprehu shqetësimin se publiku ka krijuar mendimin se të gjitha goditjet janë drejtuar ndaj opozitës, duke lënë të paprekur kryeministrin. Ai theksoi se për të fituar besimin publik, duhet të ketë një shpejtësi më të madhe në procedimet penale që të tregojë se askush nuk është mbi ligjin.

Dumani iu përgjigj duke thënë se SPAK nuk mund të plotësojë orekset mediatike dhe se hetimet e tyre bazohen në prova, jo në emra apo pozita. Ai theksoi se SPAK vepron pa axhendë dhe se rëndësia e provave është parësore në çdo hetim.

Altin Dumani: “Ne nuk mund të plotësojmë orekset mediatike, ne nuk kemi axhendë. Për ne pak rëndësi ka emri, por prova ka rëndësi. Edhe ju jeni jurist dhe e dini që prova prevalon mbi çdo gjë. Këtë po demonstrojmë brenda ditës dhe po ecim me hapa të ngadaltë që të mos bëjmë autogol.”