Skandali që ka tronditur futbollin turk thellohet dita-ditës. Paraditen e kësaj të premteje, autoritetet turke kanë arrestuar 17 arbitra dhe presidentin e një klubi të Superligës, në kuadër të një hetimi të gjerë mbi një sistem bastesh ilegale që përfshin edhe zyrtarë të lartë të sportit.

Prokuroria e Stambollit ka lëshuar urdhër-arrest për 21 persona, mes të cilëve ndodhen 17 arbitra, presidenti i një klubi të elitës, një ish-pronar dhe një ish-president federate. Arrestimet janë kryer në 12 qytete të ndryshme të Turqisë, ndërsa emrat e të ndaluarve nuk janë bërë publikë për arsye hetimi.

Sipas njoftimeve zyrtare, të arrestuarit akuzohen për “abuzim me detyrën” dhe “manipulim të rezultateve të ndeshjeve”. Ky zhvillim vjen pak ditë pas vendimit të Federatës Turke të Futbollit për pezullimin e 149 arbitrave dhe asistentëve, pasi hetimet kishin zbuluar përfshirjen e tyre në vënien e basteve për ndeshjet e kampionateve profesioniste.

Federata njoftoi se masat disiplinore mund të variojnë nga 8 deri në 12 muaj pezullim, por ende nuk është konfirmuar nëse arbitrat e pezulluar kanë vënë bast në ndeshjet që vetë kanë drejtuar.

Presidenti i Federatës, Ibrahim Haciosmanoglu, e quajti situatën “një krizë morale për futbollin turk”, duke theksuar se 371 nga 571 arbitrat aktivë në kampionatet profesioniste kishin llogari bastesh, ndërsa 152 prej tyre merrnin pjesë rregullisht në aktivitetin e paligjshëm — përfshirë edhe shtatë arbitra të nivelit më të lartë.

Skandali ka ngritur kërkesa të forta për transparencë nga klubet dhe opinionin publik, ndërsa disa drejtues po kërkojnë pezullimin e përkohshëm të kampionatit deri në zbardhjen e plotë të hetimeve.