Pas vendimit të GJKKO për të mos ndryshuar masën e sigurisë “arrest me burg” për Ilir Metën, Monika Kryemadhi ka komentuar për gazetarët lidhur me mundësinë e dërgimit të veshjeve apo ushqimeve bashkëshortit të saj. E pyetur nëse do t’i çonte veshje dhe ushqime Metës në paraburgim, Kryemadhi u përgjigj shkurt: “Nuk pranon asgjë nga unë.”

Kjo deklaratë u bë menjëherë pas transferimit të Metës në Burgun 313, duke reflektuar një distancë të dukshme mes bashkëshortëve në këtë situatë të ndërlikuar politike dhe ligjore.

Ilir Meta futet në burg.Ish presidenti i Republikës, aktualisht Kryetari i Partisë së Lirisë, do të qëndrojë në një nga qelitë e paraburgimit tek “313-a” në Tiranë, të paktën deri në përfundim të hetimeve që SPAK ka nisur ndaj tij dhe bashkëshortes në proces divorci, Monika Kryemadhi.

Gjuhën e ashpër ndaj drejtësisë Ilir Meta e artikuloi edhe në dyert e gjykatës, përballë 3 prokurorëve të SPAK të cilët kërkuan arrestimin e tij, Altin Dumanit, Arben Krajës dhe Sotir Kllapit. Në nisje të seancës me dyer të mbyllura, (ora 09:00) Meta iu drejtua me kërcënime të hapura, fjalë të rënda dhe ofenduese ndaj kreut të SPAK, duke e cilësuar “Dumduman”, “Qen” dhe madje ka kapur veshin duke i thënë “Këtu ta kam, mbajë mend çfarë kam për të të punuar”.
Nga ana e tyre të tre prokurorët nuk reaguan por mbajtën qetësinë.
Të njëjtën gjuhë përdori ndaj tyre edhe Monika Kryemadhi, e cila në eksperiencën e saj të parë me një seancë, ashtu siç paralajmëroi në hyrje të Gjykatës së Posaçme, u kujdes më shumë të shohë fytyrat e hetuesve dhe nivelin e tyre të inteligjencës.
Gjuha e ashpër u qetësua me ikjen e Dumanit për shkak të axhendës dhe rinisjen e seancës në orën 13:30.
Futjen në një sallë me Ilir Metën në seancën drejtuar nga gjyqtari Kryemadhi e quajti provokim.