Kryeministri Edi Rama, njëkohësisht kryetar i Partisë Socialiste, ka prezantuar sot para të rinjve të Elbasanit skuadrën e re të kandidatëve të partisë për këtë qark.

Në fjalën e mbajtur, Rama theksoi se është koha për të dhënë zë të rinjve, ata që vijnë nga të gjitha shtresat e shoqërisë dhe që janë të gatshëm të kontribuojnë me idetë dhe energjinë e tyre. Ai nënvizoi se është e rëndësishme që ata që kanë dëshirën dhe këmbënguljen të dëgjohen, të kenë mundësinë të shprehin mendimet dhe vizionin e tyre.

“Duhet t’i japim zë atyre që kanë dëshirë të thonë fjalën e tyre dhe nga ana tjetër kanë edhe këmbënguljen të dëgjohen për fjalën që thonë.”

Rama shprehu kënaqësinë që, pas një përpjekje të gjatë, Partia Socialiste ka arritur të ofrojë një mundësi zgjedhjeje të pasur për shqiptarët, kudo ku janë, në çdo qark, bashki apo komunitet. Ai shtoi se kjo është një mundësi që nuk ka ekzistuar më parë për qytetarët shqiptarë.

Kryeministri gjithashtu theksoi se kjo skuadër e re do të përfaqësojë jo vetëm mandatin e katërt, por do të jetë edhe PS e vitit 2030. Ai përmendi një nga kandidatët e rinj, Borën, duke e cilësuar si një shembull të mundësive që ofron ky proces.  Bora, e cila ishte një nga të rinjtë që garoi në platformën “deputeti që duam” 4 vjet më parë, tani do të jetë një nga deputetët e mundshëm në Kuvendin e Shqipërisë.