Kryeministri Edi Rama ka uruar Hirësinë e Tij, Joan Pelushi, për zgjedhjen si Kryepeshkop i ri i Kishës Ortodokse Autoqefale të Shqipërisë. Në një postim në rrjetet sociale, Rama shprehu kënaqësinë e tij për zgjedhjen e një shqiptari ndër më të mirët për këtë pozicion dhe uroi që Zoti ta mbrojë dhe ta udhëzojë gjithnjë Hirësinë Pelushi në misionin e tij të udhërrëfyesit të grigjës ortodokse.

“Me kënaqësinë e rrallë të zgjedhjes së një shqiptari ndër më të mirët në krye të Kishës Ortodokse Autoqefale të Shqipërisë, si edhe me urimin e posaçëm për Hirësinë e Tij, Kryepeshkopin Joan Pelushi, që Zoti ta mbrojë e ta udhëzojë gjithnjë në misionin e Tij të udhërrëfyesit të grigjës së besimtarëve ortodoksë,” shkruan Rama.

Hirësi Joan Pelushi u zgjodh dje Kryepeshkopi i ri i Kishës Ortodokse Autoqefale të Shqipërisë nga Sinodi i Shenjtë i Kishës Ortodokse, pas Liturgjisë Hyjnore të së dielës, e cila përkon me të dielën e dytë të Kreshmës për besimtarët ortodoksë.