Hetimet për vrasjen e të riut shqiptar, Kasem Kasmi, vazhdojnë nga autoritetet italiane pa ndërprerje. Një ndër hetimet kryesore po përqendrohet në motivin e vërtetë të ngjarjes tragjike që ka tronditur Frosinonen dhe ka sjellë vdekjen e Kasem Kasmit.

Autopsia e trupit të Kasmit është kryer në morgun e spitalit “Fabrizio Spaziani” në Frosinone. Rezultatet e plota të kësaj autopsie pritet të bëhen të njohura pas 60 ditësh, kur mjeku i caktuar nga zv.prokurori Manuel Samuel Amari do t’i prezantojë raportet.

Hipoteza kryesore që po ndiqet përfshin paratë, duke pasur parasysh se në shtëpinë e Mikea Zakës (23 vjeç, vrasësi) u gjetën 20 mijë euro në para cash. Versioni i ofruar nga vrasësi, i lidhur me një grindje mes grupeve për një çështje që lidhet me një grua, duket se nuk është mbështetur nga provat.

Gjithashtu, hetuesit janë ende në kërkim të armës së krimit, e cila ende nuk është gjetur. Krimi i rëndë ndodhi mbrëmjen e së shtunës në qendër të Frosinones, jashtë një lokali, dhe solli jo vetëm vdekjen e Kasmit, por edhe plagosjen e tre personave të tjerë, prej të cilëve një person ndodhet në gjendje të rëndë në spital. 23-vjeçari Mikea Zaka është arrestuar me akuzën e vrasjes dhe vrasjes së trefishtë të mbetur në tentativë.