Në një operacion të quajtur “Imazhi 1”, autoritetet policore në Lezhë kanë zbuluar dhe shkatërruar një plantacion të madh të kanabisit, duke sekuestruar mijëra bimë kanabisi. Gjatë operacionit, dy persona u arrestuan në flagrancë, Armel Nikdukaj dhe Elvis Shpellzai, të dyshuar për përshtatjen e një stani në pyllin e fshatit Kashnjet për kultivimin e bimëve narkotike.

Në banesat e të dy të arrestuarve u gjetën armë të ftohta dhe një maskë. Ndërkaq, shtetasi Armando Ndreca, vëllai i deputetit socialist Eduard Ndreca, u ndalua pas dyshimeve se ishte i përfshirë në këtë veprimtari kriminale. Megjithatë, gjatë marrjes në pyetje, ai mohoi përfshirjen e tij në këtë veprimtari.

Materialet procedurale për rastin u kaluan në Prokurorinë pranë Gjykatës së Shkallës së Parë të Juridiksionit të Përgjithshëm në Lezhë për hetime të mëtejshme. Operacioni “Imazhi 1” u realizua në përputhje me një plan operacional policor për të parandaluar dhe goditur tentativat e kultivimit të bimëve narkotike në ambiente të hapura ose të mbyllura.