Një rreshter i policisë së Nju Jorkut, Watson Morgan, vrau gruan e tij shqiptare, Ornela Morgan, dhe dy fëmijët e tyre në një akt të tmerrshëm, përpara se të kryente vetëvrasje. Viktimat janë identifikuar si Watson Morgan (49 vjeç), Ornela Morgan (43 vjeç) dhe dy djemtë e çiftit, 10 dhe 12 vjeç.

Ngjarja ndodhi në shtëpinë e tyre në New City, një periferi e qytetit të Nju Jorkut. Trupat e tyre u zbuluan pasi Watson nuk u paraqit për turnin e tij të mbrëmjes në Departamentin e Policisë Bronxville, ku ai shërbente si oficer për shtatë vjet.

Autoritetet zbuluan se të katër personat kishin plagë me armë zjarri, ndërsa një pistoletë u gjet në vendngjarje. Familja e tronditur dhe komuniteti janë prekur thellë nga kjo ngjarje e papritur.

Sipas një postimi në Twitter nga llogaria zyrtare e Educators of New York, Ornela Watson ishte një mësuese e shkollës publike në qytetin e Nju Jorkut.

Një fqinje e familjes, e cila kërkoi të mos i përmendej emri, tha për New York Post se komuniteti kishte mbetur i tronditur.

“Kurrë në një milion vjet nuk do të prisja që ai të bënte diçka të tillë,” tha gruaja. “Fëmijët ishin gjithmonë këtu duke luajtur jashtë, dhe nëna e tyre ishte thjesht personi më i ëmbël që keni takuar ndonjëherë… Jemi në shok. Të gjithë në këtë komunitet janë të tronditur.”

Shefi i policisë së Bronxville, Christopher Satriale tha në një deklaratë se tragjedia e la departamentin me “zemra thellësisht të thyera për humbjen e pakuptimtë të jetëve të pafajshme”.