Prishtinë – Kuvendi i Kosovës do të tentojë edhe sot, për herë të 27-të, të dalë nga ngërçi politik që po e mban peng konstituimin e këtij institucioni që nga zgjedhjet e fundit. Seanca pritet të nisë në orën 11:00, por ende nuk ka shenja konkrete se do të ketë përparim.

Në seancën e djeshme nuk u arrit të krijohej komisioni zgjedhor për organizimin e votimit të fshehtë për zgjedhjen e kryetares së Kuvendit, gjë që ka zgjatur ngërçin prej katër muajsh. Kryesuesi i seancës, Avni Dehari, i ftoi partitë politike që të propozonin anëtarët e tyre për komisionin, por propozimet nuk morën mbështetje, duke çuar në dështimin e procesit. Seanca u ndërpre dhe do të vazhdojë më 5 qershor.

Sipas rregullores së Kuvendit, propozimi për kryetar është e drejtë ekskluzive e partisë fituese, në këtë rast Lëvizjes Vetëvendosje (LVV), e cila ka kandiduar Albulena Haxhiun për këtë post. Megjithë gatishmërinë për marrëveshje politike me partitë tjera, LVV ka bërë të qartë se nuk do të propozojë emër tjetër.

Përveç zgjedhjes së kryetarit, duhet të zgjidhen edhe pesë nënkryetarë të Kuvendit, për të mundësuar konstituimin e plotë të legjislaturës së nëntë. Vetëm pas përmbylljes së këtyre proceseve mund të fillojë formimi i Qeverisë së re.

Ngërçi politik vazhdon si pasojë e mungesës së shumicës parlamentare nga ndonjë subjekt i vetëm dhe dështimit për të arritur një koalicion funksional që do t’i japë stabilitet institucioneve të vendit.