Seanca plenare e Kuvendit të Shqipërisë do të mbahet të mërkurën në orën 10:00, me urdhër të kryetarit të Kuvendit, Niko Peleshi.

Në rend të ditës janë dy projektvendime: “Për caktimin e përbërjes së komisioneve të përhershme të Kuvendit” dhe “Për caktimin e anëtarëve zëvendësues në përbërjen e komisioneve të përhershme”. Këto vendime pritet të kalojnë në seancë pas miratimit paraprak në Konferencën e Kryetarëve, e cila u zhvillua sot nën drejtimin e Peleshi.

Propozimet janë depozituar vetëm nga grupi parlamentar i Partisë Socialiste, çka ka shtuar tensionet mes mazhorancës dhe opozitës. Kjo e fundit ka paralajmëruar ankimim në Gjykatën Kushtetuese, duke argumentuar se ndryshimet në rregulloren e Kuvendit nuk duhej të miratoheshin me procedurë të përshpejtuar, por me dakordësinë e pakicës parlamentare.

Në seancën e 16 shtatorit, me 79 vota pro dhe asnjë kundër, Kuvendi miratoi ndryshimet që përcaktojnë ngritjen e 11 komisioneve parlamentare të përhershme, mes të cilëve:
• Komisioni për Ekonominë, Punësimin dhe Financat
• Komisioni për Çështjet Ligjore dhe Administratën Publike
• Komisioni për Edukimin, Shkencën dhe Sportet
• Komisioni për Shëndetësinë dhe Mirëqenien Sociale
• Komisioni për Europën dhe Punët e Jashtme, etj.

Seanca e fundit plenare, ajo e 18 shtatorit, u shoqërua me tensione dhe dhunë mes deputetëve të opozitës, duke u ndërprerë vetëm pas 25 minutash. Për shkak të përplasjes, kryetari i grupit socialist, Taulant Balla, kërkoi kalimin direkt në proces votimi, duke miratuar programin politik dhe përbërjen e qeverisë së re me 82 vota pro.

Mazhoranca shprehet se procesi është ligjor dhe në përputhje me rregulloren, ndërsa opozita e sheh si shkelje të hapur të procedurave dhe si një tjetër rast përjashtimi të saj nga vendimmarrja parlamentare.