Këtë të premte policia e Kosovës arrestoi Naim Murselin i akuzuar për urdhërimin e vrasjes së bashkëshortes së tij Liridona Murseli.

Pas hetimeve të kryera, prokuroria e Prishtinës ka deklaruar se nuk kemi të bëjmë me një grabitje, por me një vrasje të mirëplanifikuar.

Për nga skenari rasti i ngjan atij të Babis Anagnostopoulos, 33 vjeçari grek i cili planifikoi vrasjen e gruas së tij dhe e bëri të dukej si një grabitje.

Murseli njihet për angazhimin e tij si pjesë e stafit të ngushtë të kreut të Aleancës Kosova e Re, Behgjet Pacolli.

Në rrjetet e tij sociale ai publikon shpesh foto nga jeta luksoze që ka bërë në Suedi, por edhe në udhëtime të ndryshme bashkë me Pacollin.

Murseli e ka kryer edhe shkollën e mesme në Gjimnazin “Agnebergs” në qytetin Uddevalla nga viti 2006 deri në vitin 2009 në Suedi, megjithatë nuk dihet se në çfarë drejtimi.

Pas kësaj, Murseli ka regjistruar shkollën për Biznes në vitin 2010 për të diplomuar më pas. Nga viti 2011, ai ka punuar në Suedi si shitës dhe agjent i shitjes në kompani të ndyrshme suedeze.

Ai gjithashtu figuron si themelues i një kompani mediale dhe se është marrë edhe me marketing në Suedi.Nga martesa e tyre çifti Murseli kanë dy fëmijë.