Gjykata Supreme e Kosovës ka shprehur shqetësim të thellë lidhur me sulmet e fundit të anëtarit të Komisionit Qendror të Zgjedhjeve (KQZ), Alban Krasniqi, nga radhët e Lëvizjes Vetëvendosje, i cili gjatë mbledhjes së KQZ-së më 1 shtator 2025, përdori gjuhë të papranueshme ndaj Gjykatës Supreme dhe gjyqtarit të kësaj gjykate, Zenel Leku.

Në njoftimin e saj, Gjykata Supreme thekson se deklaratat e tilla përbëjnë sulm të drejtpërdrejtë ndaj integritetit të gjyqtarit dhe sistemit të drejtësisë në Kosovë. “Lakimi dhe krahasimi i emrit të gjyqtarit Zenel Leku është tentativë e ulët për ta dëmtuar figurën e tij dhe për ta minuar besimin në drejtësi”, thuhet në reagim.

Gjykata vë në dukje se shpikja e teorive konspirative, etiketimet dhe përpjekjet për denigrim të figurave të gjyqtarëve të Gjykatës Supreme në një institucion si KQZ, ku pritet maturi, qartësi dhe respekt, tregon mungesë të kulturës politike. Më tej, Supremja nënvizon se qytetarët e Kosovës kanë nevojë për përfaqësues që respektojnë institucionet, jo për ata që përpiqen t’i delegjitimojnë ato me akuza pa fakte.

Gjykata Supreme thekson se në një shtet demokratik, gjyqësori është ai që garanton barazinë dhe drejtësinë zgjedhore, dhe se përpjekjet për diskreditimin e një gjyqtari të instancës më të lartë janë të dëmshme dhe të papranueshme për gjykatën, për gjyqtarin dhe për gjithë shoqërinë.

Në përfundim, Supremja dënon ashpër përdorimin e gjuhës së papranueshme dhe thekson rëndësinë e respektit ndaj institucioneve dhe figurave të drejtësisë, duke i bërë thirrje të gjithë aktorëve politikë që të veprojnë me përgjegjësi dhe maturi.