Tiranë – Kryetari i lëvizjes “Shqipëria Bëhet”, Adriatik Lapaj, ka refuzuar ofertën për bashkëpunim me forcat e tjera opozitare të kryesuara nga Partia Demokratike, për të dalë me një kandidat të vetëm në zgjedhjet e parakohshme për Bashkinë e Tiranës.

“Nuk dua të jem ai që prish festën! Por mënyra si po procedohet nuk është e duhur, po procedohet përmes një kandidati partiak. Po flasim për një qytet me afro 700 mijë votues, qyteti më i madh, me elektoratin më të madh në vend”, deklaroi Lapaj në emisionin Opinion.

Ai u shpreh se zgjidhja e duhur do të ishte mbështetja e një kandidati të pavarur dhe dinjitoz nga të gjitha forcat politike, por sipas tij, kjo nuk do të ndodhë. “Nuk mund të bëhem palë e një procesi partiak”, tha Lapaj, duke mbyllur derën e çdo marrëveshjeje me subjektet opozitare.

Këlliçi: Opozita mirëpret çdo faktor kundër Ramës

Në krahun tjetër, deputeti demokrat Belind Këlliçi tha se opozita mbetet e hapur për të gjithë ata që duan të jenë pjesë e një fronti të përbashkët kundër qeverisë.

“Si opozitë e bashkuar, kemi pasur takime me të gjitha partitë parlamentare për të gjetur idetë më të mira, për të bashkuar forcat me çdo faktor opozitar. Kushdo që do një front të unifikuar përballë Ramës, ne i mirëpresim”, u shpreh Këlliçi.

Ai pranoi se ende nuk janë përcaktuar emrat e mundshëm të kandidatëve për Tiranën, duke theksuar se kjo çështje do të diskutohet në tryezën e aleatëve opozitarë.