Stefano Sannino, një nga figurat më të larta të Shërbimit Diplomatik të Bashkimit Europian, ka njoftuar largimin e tij të parakohshëm nga posti i Drejtorit të Përgjithshëm për Lindjen e Mesme, Afrikën e Veriut dhe Gjirin. Vendimi vjen mes hetimeve të zgjeruara që po tronditin institucionet europiane, ku janë përfshirë edhe ish-përfaqësuesja e lartë Federica Mogherini dhe Kolegji i Evropës.

Sannino u mor në pyetje këtë javë në lidhje me dyshime për keqpërdorim të fondeve të BE-së në një projekt të zhvilluar gjatë kohës që ai shërbente si Sekretar i Përgjithshëm i EEAS. Përmes një mesazhi të brendshëm të siguruar nga Euractiv, ai konfirmoi se është shpallur i dyshuar, por shtoi se “ka besim të plotë në punën e magjistratëve” dhe se është i bindur që gjithçka do të sqarohet.

Zyrtari europian u ndalua dhe më pas u lirua vonë të martën, ndërsa hetimi vazhdon të zgjerohet. Ai deklaroi se, për të mbrojtur integritetin dhe funksionimin e Drejtorisë së Përgjithshme, nuk e konsideron më të përshtatshme të vazhdojë në detyrë. Sannino do të dalë në pension në fund të dhjetorit.

“Drejtoria e Përgjithshme duhet të mbetet e fokusuar në detyrat e saj dhe në agjendën ambicioze që kemi zhvilluar,” theksoi ai në email.

Pas largimit të tij, zëvendësi Michael Karnitschnig ka marrë menjëherë detyrën si drejtor në detyrë. Ky shënon dorëheqjen e parë të nivelit të lartë të lidhur drejtpërdrejt me hetimin që ka prekur EEAS dhe Kolegjin e Europës.