Kandidati për deputet i opozitës në qarkun e Beratit, Lefter Maliqi, ka intensifikuar takimet elektorale në prag të përmbylljes së fushatës. Ai ka paralajmëruar një miting festiv madhështor sot, në orën 17:00, në sheshin para Turizmit në Berat, ku do të marrë pjesë lideri historik i së djathtës, Sali Berisha.

Maliqi shprehet i bindur për një fitore të paprecedentë të opozitës në Berat, ku sipas tij PD dhe Opozita e Bashkuar do të arrijnë të fitojnë 4 mandate, në një ndarje që ai e quan “surprizë historike 4:3”.

“Ditë e madhe sot në Berat! Në orën 17:00, te sheshi para Turizmit, miting festiv madhështor me Liderin Berisha. Qarku Berat me fitore surprizë 4:3, për herë të parë për PD dhe Opozitën e Bashkuar. Uragani i fitores nuk ndalet. Ju mirëpresim. Fitore!”, ka shkruar Maliqi në rrjetet sociale.

Ai u ka bërë thirrje qytetarëve që të marrin pjesë masivisht në këtë aktivitet si një shenjë force dhe bashkimi, ndërsa thekson se fitorja do të vuloset më 11 maj, kur qytetarët t’u drejtohen kutive të votimit.