Duke filluar nga 1 Prilli 2025, qytetarët shqiptarë do të mund të udhëtojnë drejt Maqedonisë së Veriut me policën e sigurimit “Karton Jeshil” me vlefshmëri 1-vjeçare, e cila do të kushtojë vetëm 50 euro.

Ky është hapi i dytë në një kohë të shkurtër për lehtësimin e lëvizjes ndërkufitare, pas hyrjes në fuqi të policës së sigurimit “Karton Jeshil” 1-vjeçar për Malin e Zi më 1 Shkurt 2025.

Masa për lehtësimin e qarkullimit ndërkufitar

Ky vendim vjen si rezultat i bashkëpunimit mes Autoritetit të Mbikëqyrjes Financiare (AMF) dhe Byrosë Shqiptare të Sigurimeve (BSHS), në kuadër të zbatimit të rekomandimeve të Komitetit të Përbashkët të Marrëveshjes së Tregtisë së Lirë të Europës Qendrore (CEFTA) për të lehtësuar qarkullimin e mjeteve me targa shqiptare në vendet kufitare.

Detajet e reja të sigurimit
• Polica “Karton Jeshil” 1-vjeçar për Maqedoninë e Veriut – 50 euro
• Polica “Karton Jeshil” 1-vjeçar për Malin e Zi – 50 euro
• Polica 15-ditore – 15 euro

“Karton Jeshil” është një dokument sigurimi ndërkombëtar që mbulon përgjegjësinë e drejtuesve të mjeteve me targa shqiptare në rast aksidenti jashtë vendit. Kjo masë synon reduktimin e kostove, rritjen e qarkullimit dhe nxitjen e bashkëpunimit ekonomik me fqinjët.

Të gjitha shoqëritë e sigurimit do ta ofrojnë këtë policë në pikat e tyre të shitjes, duke lehtësuar qarkullimin për qytetarët shqiptarë në rajon.