Piloti britanik Lewis Hamilton ka lënë një kujtim të paharrueshëm për ish-kolegët e tij te Mercedes, pas një periudhe 12-vjeçare me ekipin gjerman. Gjatë kësaj kohe, Hamilton fitoi gjashtë kampionate dhe luajti një rol kyç në transformimin e Mercedes në një nga ekipet më të suksesshme në Formula 1.

Pas largimit të tij për te Ferrari në fund të sezonit 2024, Hamilton ka porositur një vepër arti të veçantë për 3000 ish-kolegët e tij te Mercedes. Ai u bashkua me artistin e njohur të motorsportit, Paul Oz, për të krijuar një pikturë që përshkruan makinën e tij gjatë Çmimit të Madh të Monakos 2019.

Secili anëtar i stafit ka marrë printimin e tij të veprës, ndërsa piktura origjinale mbetet në selinë e Mercedes GP në Brackley. Në një postim në Instagram, Oz shpjegoi: “Tani që të gjithë 3000 punonjësit e Mercedes GP kanë marrë printimet e tyre, unë mund të flas për këtë.”

Ndërkohë, Hamilton është aktualisht në testime parasezonale me ekipin e tij të ri në Barcelonë, përpara sezonit të tij të parë me Ferrarin, pas një marrëveshjeje të nënshkruar me një vlerë prej 50 milionë eurosh në vit.