Në Lezhë është arrestuar një 17-vjeçar, i shpallur në kërkim prej disa muajsh, u arrestua këtë të shtunë për akuzën e tentativës për vrasje dhe drejtimin e mjetit në mënyrë të parregullt. Incidenti ndodhi më 11 prill 2025 dhe përfshiu gjashtë persona, ku i riu përdori sende të forta dhe më pas përplasi qëllimisht me makinë shtetasin 34-vjeçar F. Gj.

Policia e Lezhës njoftoi se arrestimi i 17-vjeçarit u realizua si rezultat i kontrolleve dhe punës intensive të inteligjencës informative, të cilat kishin si qëllim lokalizimin dhe ndalimin e të gjithë personave të përfshirë në konfliktin e dhunshëm.

“Si rezultat i kontrolleve dhe punës së inteligjencës informative, kryer me qëllim lokalizimin dhe ndalimin e të gjithë shtetasve të përfshirë në konfliktin për motive të dobëta, ndodhur më datë 11.04.2025, në Lezhë, shërbimet e Drejtorisë Vendore të Policisë Lezhë kapën shtetasin e shpallur në kërkim, A.M., 17 vjeç, banues në Lezhë, për veprën penale ‘Vrasja me dashje’, mbetur në tentativë, kryer në bashkëpunim, si dhe ‘Drejtim i mjetit në mënyrë të parregullt’”, thuhet në njoftimin zyrtar.

Nga hetimet e kryera rezultoi se 17-vjeçari drejtonte automjetin pa u pajisur me leje drejtimi dhe përdori makinën për të përplasur qëllimisht viktimën e tij.

Autoritetet po vijojnë punën për kapjen e të gjithë shtetasve të tjerë të shpallur në kërkim për këtë rast, ndërsa materialet procedurale iu referuan Prokurorisë së Lezhës për veprime të mëtejshme ligjore.