Në një vend ku bashkëjetesa në pallate shpesh është shoqëruar me konflikte, mungesë mirëkuptimi dhe vakum ligjor, qeveria ka ndërmarrë një hap të rëndësishëm për vendosjen e rregullave të qarta dhe të zbatueshme.

Ligji i ri Nr. 55/2025 “Për administrimin e bashkëpronësisë në ndërtesa”, i miratuar më 3 korrik dhe i publikuar tashmë në Fletoren Zyrtare, sjell një koncept të ri mbi mënyrën se si menaxhohen hapësirat e përbashkëta në ndërtesa.

Çfarë ndryshon?

Ky ligj zëvendëson ligjin e vitit 2009, i cili në praktikë kishte mbetur thuajse i pazbatueshëm. Për herë të parë, çdo ndërtesë me më shumë se një pronar nuk mund të jetë më “pa zot”. Bashkëpronësia nuk shihet më si çështje vullneti apo mirëkuptimi, por si një detyrim ligjor.

Hapësirat e përbashkëta – shkallët, ashensorët, garazhet, tarracat, bodrumet, fasadat, oborret apo lulishtet – do të regjistrohen në dokumentacionin kadastral si pasuri në bashkëpronësi, duke mbyllur derën për abuzime apo konfuzion.

Administrator i detyrueshëm

Ligji detyron që çdo pallat të ketë një administrator, i cili mund të jetë një nga banorët ose një shoqëri e specializuar e licencuar nga bashkia. Administratori do të ketë përgjegjësi të qarta:
• Mirëmbajtje dhe pastrim
• Riparime dhe kontrata me furnitorë
• Mbledhje të kuotave mujore
• Përfaqësim ligjor të ndërtesës.

Kontrata me administratorin është e detyrueshme për të paktën 3 vjet dhe përfshin raportim vjetor të detajuar për shpenzimet.

Vendimmarrja kolektive

Të gjithë banorët janë të detyruar të marrin pjesë në mbledhjet e asamblesë së bashkëpronarëve. Në këto mbledhje, me shumicë votash vendoset për buxhetin, investimet, riparimet apo edhe shkarkimin e administratorit në rast mosfunksionimi.

Një risi e rëndësishme është se vendimet e kryesisë së zgjedhur kanë fuqi ligjore për të gjithë. Kjo shmang situatat kur një pakicë bllokon vendimmarrjen.

Përgjegjësia e ndërtuesve dhe roli i bashkisë

Shoqëritë ndërtuese janë përgjegjëse për administrimin e ndërtesës deri në momentin e dorëzimit të certifikatës së shfrytëzimit. Ata detyrohen të përfshijnë në kontratat e shitjes rregulloren e administrimit dhe aktin e bashkëpronësisë, që regjistrohen në Kadastër.

Ndërkohë, bashkitë do të mbikëqyrin, certifikojnë administratorët, ruajnë librin e bashkëpronësisë dhe mund të vendosin gjoba për shkelje. Dokumentet do të jenë të aksesueshme për banorët edhe në portalin e-Albania.

Një hap drejt qytetarisë urbane

Ky ligj synon të vendosë rregull, të ruajë vlerën e pronës së përbashkët dhe të përmirësojë cilësinë e jetës në qytete. Për herë të parë, qytetarët ndihen të mbrojtur ligjërisht jo vetëm për apartamentin e tyre, por edhe për hapësirat që ndajnë me fqinjët.