Kryetarja e Kuvendit të Shqipërisë, Lindita Nikolla, të martën e 1 shkurtit, ka mirëpritur ambasadorin e ri të Emirateve të Bashkuara Arabe, Sulaiman Humand Salem Al Mazroui.

“Duhet të punojmë për zgjerimin dhe intensifikimin e bashkëpunimit parlamentar”, tha Nikolla gjatë takimit, “për të nxitur bashkëpunimin politik, ekonomik në fushën e investimeve”.

Po ashtu, Nikolla tha se bashkëpunimi mes grupeve parlamentare të miqësisë, do të mbështesë bashkëpunimin parlamentar dhe në fusha të tjera.

Kurse ambasadori nënvizoi se do të nxisë me përparësi bashkëpunimin në fushën ekonomike dhe të investimeve mes dy vendeve, në mënyrë që Shqipëria të përfitojë sa më shumë nga përvojat bashkëkohore të vendit të tij në mjaft fusha si zhvillimi i transportit detar, transportit ajror, turizmit etj.

Në përmbyllje, Nikolla i ka uruar suksese ambasadorit në misionin e tij jo rezident në Shqipëri.