Enkelejd Alibeaj, deputet i Partisë Demokratike, shprehu shqetësimet e tij në foltorjen e Kuvendit duke theksuar se, në ditën e fundit të punës së komisionit të reformës zgjedhore, produkti i vetëm i dalë është propozimi i PD-së që është paraqitur 5 muaj më parë. Ai po ashtu bëri thirrje për lista të hapura, por deklaroi se ka deputetë të parlamentit që nuk e duan këtë, duke treguar frikën e tyre përballë qytetarëve. Alibeaj vuri në dukje rikthimin e normalitetit në parlament, por kërkoi që kjo të jetë e shoqëruar me veprime reale. Ai bëri apel për të mos heshtur dhe për të votuar sot për propozimin e PD-së për listat e hapura, votimin-numërim elektronik dhe votën e diasporës.

Nuk mund të mos e përshëndes rikthimin e normalitetit në parlament. Por duhet të jetë real. Anormaliteti vazhdon kur parlamenti hesht. Sot është dita e fundit e reformës zgjedhore. Duket qartë pakti dhe marrëveshja. Heshtja. Ky parlament e ka për detyrë të deklarojë edhe dështimin e reformës ku detyrën e keni ju për të nxjerrë në rend dite produktin e reformës projektligjin e propozuar nga PD, 5 muaj më parë. Ne kemi depozituar variantin tonë listat e hapura, Shqipëria një zonë, votimi numërim elektronik, vota e diasporës. Kërkesa ime për procedurë është që sot të marrim kurajë dhe të votojmë edhe kundër të flasim shqiptarëve ashtu siç duhet. Të pranojnë pra që nuk duan listat e hapura, votën e diasporës, pranojnë pra që ti dhurojmë 6 mandate Edi Ramës me këtë sistem. Dhe të dalim pastaj përpara shqiptarëve. Kjo është një çështje që duhet të ndodh tani. Heshtja është pakt, pazar në kurriz të shqiptarëve. Për të mbrojtur listat e mbyllura. Bajlozat të rrinë këtu sepse kanë frikë. Deputetë që kanë frikë të përballen me qytetarët. T’i hapim letrat ta tregojmë se sa kurajozë jemi. Njofto që është depozituar ligji nga PD dhe të futet në procedura për listat e hapura, votim-numërim elektronik, votën e diasporës.’, tha Alibeaj.