Ligjvënësit lituanez kanë miratuar njëzëri një rezolutë që e shpall Rusinë “një shtet terrorist” dhe e quan pushtimin e paprovokuar të Ukrainës nga Moska “gjenocid kundër popullit ukrainas”.

Në rezolutë, Parlamenti i Lituanisë, njohu agresionin e armatosur në shkallë të plotë, pra luftën kundër Ukrainës nga forcat e armatosura të Federatës Ruse dhe udhëheqja e saj politike dhe ushtarake, si gjenocid kundër popullit ukrainas.

E miratuar unanimisht, rezoluta akuzon forcat ushtarake ruse për shënjestrim të qëllimshëm dhe sistematik të objektivave civile, duke e shpallur Rusinë një shtet që mbështet dhe kryen terrorizmin.

Rezoluta u bën thirrje Kombeve të Bashkuara, Parlamentit Evropian, Asamblesë Parlamentare të Këshillit të Evropës, Asamblesë Parlamentare të OSBE-së, Asamblesë Parlamentare të NATO-s, parlamenteve dhe qeverive të huaja që të njohin dhe ndjekin penalisht gjenocidin, krimet e luftës dhe krimet kundër njerëzimit të kryera nga Federata Ruse.