Në një intervistë të drejtpërdrejtë për emisionin “Live From Tirana”, stilisti i njohur Desi Doce ndau opinionin e tij mbi stilin e disa prej figurave më të njohura të ekranit dhe politikës shqiptare, me fokus te zgjedhjet dhe mënyra se si u paraqitën disa prej politikanëve në ditën e votimit.

I pyetur nga moderatori Ronaldo për zgjedhjen e veshjes së Elisa Spiropalit, e cila votoi me një xhaketë dhe T-shirt të bardhë, kombinuar me një fund fizarmonike “gold në kafe”, Desi e përshkroi veshjen si interesante, por me disa rezerva.

“Thyerja e xhaketës me fundin ishte shumë interesante, por jo goditja e duhur me ngjyrat që kishte zgjedhur. Elisa ka tipare shumë të buta dhe do t’i shkonte një ngjyrë më e fortë për të balancuar hijeshinë që ka. Ishte një zgjidhje që mund të ishte përmirësuar lehtësisht me një kapëse te jakëza e xhaketës. Nuk është ndër më të veshurat keq, por mund të kishte bërë më mirë,” – komentoi Desi.

Ndërsa për Belinda Ballukun, e cila zgjodhi një kostum me ngjyrë vishje dhe një këmishë blu, stilisti tha se, ndonëse zgjedhja mund të ketë pasur një mesazh politik, kombinimi nuk funksionoi në aspektin estetik.

“Ishte një pamje e pastër, me një look të kujdesshëm, siç u kërkohet zakonisht politikanëve. Por në aspektin e modës, ngjyrat ishin të forta dhe përplaseshin me njëra-tjetrën. Veshja nuk ishte aty ku duhet. Nga politika mund të ketë qenë një ngacmim i bukur, por nga moda, jo,” – u shpreh Desi.

Analiza e sinqertë e stilistit ngjalli interes për mënyrën se si politikanët përdorin stilin dhe ngjyrat si pjesë të komunikimit të tyre publik, veçanërisht në ditë të rëndësishme si ajo e votimit.