Presidenti turk, Recep Tayyip Erdogan, tha të premten se reagimi i NATO-s dhe vendeve perëndimore lidhur me sulmin e Rusisë ndaj Ukrainës nuk ishte i vendosur, duke shtuar se ai shpresonte se samiti i NATO-s të premten do të çonte në një pozicion më të vendosur të Aleancës.
Turqia, anëtare e NATO-s, kufizohet me Ukrainën dhe Rusinë në Detin e Zi dhe ka lidhje të mira me të dyja vendet. Ajo i bëri thirrje Rusisë që të ndalojë sulmin dhe shprehu mbështetjen për integritetin territorial të Ukrainës.
“Kjo nuk do të duhej të kthehej në një vërshim të dënimeve të zakonshme. NATO duhet të kishte ndërmarrë një hap më të vendosur”, tha Erdogan pas lutjes të së premtes në Stamboll.
“BE-ja dhe të gjitha mentalitetet perëndimore nuk kanë treguar një qëndrim të caktuar serioz. Të gjithë ata vazhdimisht po e këshillojnë Ukrainën”, u tha ai gazetarëve. “Me këshillë nuk mund të arrihet diku. Kur shikoni hapat e ndërmarra, ata nuk janë fare”.
Pavarësisht valës së sanksioneve perëndimore kundër Rusisë, Turqia ka thënë se kundërshton lëvizje të tilla. Erdogan gjithashtu shmangu përdorimin e fjalëve të tilla si “dënoj” në reagimin e tij ose “pushtim” për të përshkruar atë që po ndodhte.
Presidenti ukrainas Volodymyr Zelenskyi i bëri thirrje Evropës të premten të veprojë më shpejt dhe më fuqishëm për vendosjen e sanksioneve ndaj Moskës për shkak të pushtimit të Ukrainës, duke akuzuar aleatët perëndimorë për politikëbërje, ndërkohë që forcat e Moskës përparojnë drejt Kievit.
Të enjten, Ukraina i kërkoi Turqisë të mbyllte Bosforin dhe Dardanelet, që lidhin Mesdheun dhe Detin e Zi me Rusinë, sipas paktit të vitit 1936. Megjithatë, Ankaraja tha të premten se nuk mund të pengojë hyrjen e anijeve ruse në Detin e Zi sepse, sipas një marrëveshjeje ndërkombëtare, ajo ka të drejtë të kthejë anijet në bazat e saj.
Ambasadori i Ukrainës në Turqi, Vasil Bodnar, tha të premten se autoritetet turke dhe ukrainase ishin duke kontaktuar për t’u pajtuar për dërgimin e pajisjeve mjekësore emergjente dhe ndihmës humanitare në Ukrainë, duke përfshirë ushqimin, ilaçet dhe tendat.
Bodnar tha se lista e nevojave të Ukrainës iu paraqit Ministrisë së Punëve të Jashtme të Turqisë dhe Agjencisë së Menaxhimit të Fatkeqësive dhe Emergjencave (AFAD).
“Meqenëse listat vijnë nga Ukraina, ne do të vazhdojmë t’ua kalojmë ato autoriteteve turke”, u tha ai gazetarëve në Ankara.
Në një bisedë telefonike të premten, ministri turk i Mbrojtjes, Hulusi Akar, i tha homologut të tij ukrainas, Alexei Reznikov, se Ankaraja ishte e gatshme të ofronte ndihmë humanitare, është komunikuar nga ministria e tij.
Ministri i Jashtëm ukrainas, Dmitro Kuleba, tha gjithashtu, të premten, se ai diskutoi me homologun e tij për “hapat praktikë për të forcuar kapacitetet mbrojtëse të Ukrainës”.
Duke vendosur bashkëpunim të ngushtë me Rusinë në fushën e mbrojtjes dhe energjisë, Turqia i shiti gjithashtu Ukrainës dronë dhe nënshkroi një marrëveshje të përbashkët prodhimi. Ankaraja kundërshton gjithashtu politikën ruse në Siri dhe Libi, si dhe aneksimin e Krimesë në vitin 2014.
Erdogan, i cili më parë kishte ofruar të ndërmjetësonte krizën, tha të enjten se ishte “sinqerisht i pikëlluar” nga pushtimi i Moskës, për të cilin gjë ai tha se ishte një “goditje e rëndë” për paqen rajonale.
/REL
