Babai i Luis Meçjas, 14-vjeçarit që mbeti i plagosur në sherrin tragjik pranë shkollës “Fan Noli”, ku humbi jetën Martin Cani, ka rrëfyer mes dhimbjes përjetimet e djalit të tij dhe dëshirën e tij për të ndihmuar familjen e shokut të ndjerë.

Në një intervistë prekëse, babai i Luisit rrëfeu bisedën me të birin pas ngjarjes së rëndë, duke përshkruar dhimbjen e familjeve të përfshira. Ai tregoi se është takuar edhe me babanë e Martinit, i cili po përjeton një dhimbje të thellë. “Ai po e vuan shumë këtë pjesë. Nuk është në gjendje optimale. Sa herë që unë shkoj atje, më thotë një fjalë: ‘Mendoj se do më sjellësh djalin’, dhe unë ndihem në siklet të madh,” tha ai, i emocionuar.

Premtimi i Luisit: “Gjysma e rrogës sime do shkojë për familjen e Martinit”

Luisi, një futbollist i ri dhe me ambicie, e ka shndërruar këtë ngjarje tragjike në një motiv të dytë për të ndjekur ëndrrën e tij. Sipas babait të tij, Luisi ka dhënë një premtim prekës:

“Në kontratën e parë që unë do firmos, rroga e parë do i shkojë gjysma familjes së Martinit dhe gjysma për familjen time.”

Ky vendim i Luisit, jo vetëm që reflekton një ndjenjë të thellë solidariteti, por edhe shpresën e tij për të nderuar kujtimin e shokut të tij të skuadrës.

Babai i tij e përmbylli rrëfimin mes lotësh, duke shprehur krenarinë për djalin e tij dhe dëshirën që kjo tragjedi të shërbejë si një mësim për të gjithë, në mënyrë që të shmangen ngjarje të tilla në të ardhmen.