Kreu i Partisë Demokratike-Demokratët Euroatlantikë, Lulzim Basha, ka reaguar ashpër ndaj deklaratave të kryeministrit Edi Rama, duke e akuzuar atë për lidhje me krimin dhe për keqqeverisje. Basha tha se Rama është shndërruar në një figurë të turpshme në arenën ndërkombëtare, duke u identifikuar si “kryeministri me mandat krimi në Durrës” për shkak të lidhjeve të tij me sekserin Jurgis Çyrben.
Basha theksoi se Rama është përgjegjës për kapjen e institucioneve shtetërore dhe bashkëpunimin me elemente kriminale për përfitime personale. Ai përmendi skandalet e inceneratorëve dhe pastrimin e parave në ndërtimin e kullave shumëkatëshe si prova të kësaj keqqeverisjeje, duke akuzuar zyrtarët e lartë për lidhje me aktivitete të paligjshme.
Sipas Bashës, keqqeverisja e Ramës ka kontribuar në përkeqësimin e kushteve të jetesës për shqiptarët, të cilët po largohen masivisht nga vendi për një jetë më të mirë. Ai shtoi se shqiptarët janë të parët si azilkërkues në një vend që nuk është në luftë, dhe se pensionistët kanë pensionet më të ulëta në rajon.
Basha kritikoi gjithashtu shpenzimet e larta për shëndetësinë, të cilat shqiptarët duhet t’i paguajnë nga xhepi i tyre, duke theksuar se qeveria rimburson ilaçe pa efekte për trajtimin e sëmundjeve. Ai përfundoi se propaganda dhe shfaqjet e kushtueshme të Ramës nuk i ndihmojnë shqiptarët, por përkundrazi, i varfërojnë ata edhe më tej.
Ai që nuk vjedh, ai që nuk bashkëpunon me krimin, ai që nuk arrin deri aty sa të korruptojë edhe shefin e FBI-së të partnerit tonë strategjik, fle sipas Edi Ramës.
Për turpin e tij sot në mbarë botën tregohet me gisht si kryeministri me mandat krimi në Durrës, me sekser Jurgis Çyrben.
Kryebashkiaku i tij i pagjumë për të vjedhur me inceneratorë e 5D, pastron paratë e krimit në kullat shumëkatëshe të Tiranës. Ky nuk është problem për Edi Ramën, sepse ai qëndron prapa tij.
Zëvendëskryeministri në arrati i pandehur për korrupsion, nuk është shqetësimi i Edi Ramë, sepse gjithçka është bërë me dijeninë e tij.
Krimi në pushtet e pushteti në shërbim të krimit nuk është problemi i Edi Ramës, sepse gjithçka është bërë me urdhrat e tij.
Një e nga e një e gjithë qeveria i ka shkuar në burg, sepse kanë vjedhur paratë e shqiptarëve, sepse kanë bashkëpunuar me krimin dhe ky si gjeli majë plehut krekoset për arritjet imagjinare.
Shqiptarët janë të parët si azilkërkues nga një vend që nuk është në luftë, pensionistët kanë pensionet më të ulëta në rajon, qytetarët paguajnë 60% të shpenzimeve për shëndetësinë “falas” nga xhepi i tyre, e kjo qeveri u rimburson ilaçe pa asnjë efekt për trajtimin e sëmundjeve, vendi ynë ka çmimet më larta dhe pagat më të ulëta në Europë. Ky është realiti që rëndon sot mbi shqiptarët.
E ndërsa nuk i mashtron dot më shqiptarët, vjen vërdallë nëpër botë për t’u folur atyre të cilët duhet të mbajnë me para edhe familjen në Shqipëri për shkak të keqqeverisjes së tij.
Propaganda dhe shfaqjet e kushtueshme nëpër botë nuk i mbushin xhepat e shqiptarëve, por i varfërojnë edhe më tej ato.
