Presidenti francez Emmanuel Macron dhe bashkëshortja e tij, Brigitte Macron, kanë vendosur të ndjekin rrugën ligjore në Shtetet e Bashkuara për të kundërshtuar publikisht një teori konspirative që po qarkullon online, e shpërndarë nga influencuesja konservatore Candace Owens.

Avokati i çiftit, Tom Clare, konfirmoi se padia, e depozituar në shtetin e Delaware, ka për qëllim të mbrojë nderin dhe dinjitetin e Brigitte Macron, e cila është subjekt i pretendimeve të rreme se ka lindur mashkull. Clare e përshkroi situatën si “shumë shqetësuese” dhe me “ndikim negativ emocional” për çiftin presidencial francez.

Në një intervistë për “Paris Match”, Emmanuel Macron theksoi:
“Nuk mund të qëndrojmë në heshtje përballë një shpifjeje që prek dinjitetin dhe të vërtetën. Ajo është një grua që e dinte shumë mirë se po përhapte informacion të rremë dhe e bëri këtë me qëllim për të dëmtuar, duke i shërbyer një ideologjie.”

Brigitte Macron dhe avokatët e saj janë të gatshëm të paraqesin prova të detajuara, përfshirë foto gjatë shtatzënisë, pamje me fëmijët dhe ekspertizë shkencore, për të rrëzuar pretendimet e Owens. Clare shtoi:
“Është e dhimbshme të detyrohesh të mbrosh identitetin tënd në mënyrë kaq publike, por ajo është e gatshme ta bëjë këtë për të rivendosur të vërtetën.”

Pretendimet për gjininë e Brigitte Macron kanë qarkulluar që në vitin 2021, pas një videoje të publikuar nga blogeret franceze Amandine Roy dhe Natasha Ray. Çifti kishte fituar fillimisht një padi për shpifje në 2024, por vendimi u rrëzua në apel në 2025, jo për shkak të së vërtetës, por për arsye të lirisë së shprehjes.