Presidenti francez Emmanuel Macron ka propozuar zhvillimin e një takimi të jashtëzakonshëm në Paris, ku do të merrnin pjesë vendet e G7-ës së bashku me Rusinë dhe Danimarkën. Lajmi u bë publik nga presidenti amerikan Donald Trump, i cili deklaroi se propozimi është bërë përmes mesazheve private të shkëmbyera mes dy liderëve.

Trump i publikoi mesazhet herët gjatë ditës së sotme në platformën e tij Truth Social, ndërsa Pallati Elize konfirmoi më pas vërtetësinë e komunikimit mes presidentëve.

Në mesazhet e publikuara, Macron i referohet qëndrimeve të Trump mbi Groenlandën, duke shkruar: “Nuk e kuptoj se çfarë po bën me Groenlandën”, në lidhje me kërkesat e presidentit amerikan që SHBA-ja të marrë territorin nga Danimarka.

Më tej, Macron propozon organizimin e një takimi të enjten pasdite në Paris, ku përveç vendeve të G7-ës dhe Danimarkës, do të ftoheshin edhe Rusia, Ukraina dhe Siria, me qëllim diskutimin e zhvillimeve aktuale gjeopolitike.

Donald Trump pritet të ndodhet në Evropë në kuadër të Forumit Ekonomik Botëror në Davos, ku është planifikuar të mbajë një fjalim ditën e nesërme. Nuk ka ende një konfirmim zyrtar nëse ai do të marrë pjesë në takimin e propozuar në Paris.

Grupi i G7-ës përbëhet nga Kanadaja, Franca, Gjermania, Italia, Japonia, Mbretëria e Bashkuar dhe Shtetet e Bashkuara të Amerikës.