Brenda pak ditësh do të bëhet një muaj nga arrestimi i mafias shqiptare dhe belge në Vigo, Spanjë, pas kapjes së 1250 kilogramëve kokainë në portin e qytetit. Ndërkohë, Seksioni i Pestë i Gjykatës së Provincës së Pontevedras zhvilloi dje seancën për ankesat e paraqitura nga katër shqiptarët e arrestuar gjatë operacionit.

Avokatja mbrojtëse kërkoi lirimin e klientëve të saj, duke pretenduar shkelje të të drejtave të mbrojtjes, pasi avokati i mëparshëm kishte pasur qasje vetëm në një përmbledhje të çështjes, pa dokumentacionin e plotë të provave. Prokuroria e kundërshtoi këtë pretendim, duke theksuar se përmbledhja përmbante të dhënat thelbësore që çuan në arrestime. Vendimi do të merret nga magjistratët e gjykatës së Vigos.

Një nga të arrestuarit, Arsild B., i konsideruar si “noteri” i mafies shqiptare, kishte si detyrë konfirmimin e mbërritjes së kokainës në një nga kontejnerët e anijes “Cape Citius” nga Ekuadori. “Dërgesa e kokainës është e saktë, janë 22 pako”, thuhet se deklaroi ai pasi verifikoi mallin. Arsild B. u arrestua në një shtëpi në Bembrive, ku po shkarkohej droga, ndërsa policia ndaloi edhe drejtuesin e furgonit Fiat Ducato, Alfred N., dhe Romario C., që drejtonte një Citroën për transportin e mëtejshëm të drogës. Të gjithë këta persona kanë apeluar dënimin me burg.

Hetimet vijojnë për të zbuluar destinacionin final të ngarkesës dhe përfshirjen e mundshme të elementëve të tjerë në rrjetin e trafikut ndërkombëtar të kokainës.