Tolentino, Itali – Një ngjarje tronditëse ka ndodhur mbrëmjen e sotme në qytetin e Tolentino-s, në zonën e Maceratës, ku një grua me origjinë shqiptare është vrarë me thikë në mes të një parku publik, përpara syve të kalimtarëve.
Viktima është Gentiana Hudhra, 45 vjeçe, nënë e dy fëmijëve, e cila punonte si kujdestare në zonë. Ajo u sulmua teksa ishte në rrugë për në punë, në parkun përballë via Bennaduci, pak para orës 20:00.
Autori i dyshuar i vrasjes është ish-bashkëshorti i saj, Nikollaq Hudhra, i cili sipas dëshmitarëve nuk bëri asnjë përpjekje për t’u larguar. Kur mbërriti policia, ai ndodhej i ulur në një stol në afërsi të trupit të pajetë dhe tha thjesht: “Bëra atë që duhej të bëja.”
Një dëshmitar që ndodhej pranë vendngjarjes tregon:
“Dëgjova një britmë dhe dola nga bari. Gruaja ishte shtrirë në tokë, ndërsa burri vazhdonte ta godiste me shqelma, edhe pasi e kishte plagosur me thikë.”
Sipas burimeve hetimore paraprake, autori dyshohet se vuan nga probleme të shëndetit mendor. Autoritetet italiane kanë nisur menjëherë hetimet, ndërsa ngjarja ka tronditur thellë komunitetin vendas dhe atë shqiptar në Itali.
Ky është një tjetër rast tragjik dhune në familje, që ngre alarmin për nevojën urgjente të parandalimit dhe mbrojtjes së grave nga situata të rrezikshme, veçanërisht në rastet kur ka histori konflikti apo probleme të shëndetit mendor nga partnerët.
