Gara për të lançuar makinën e parë fluturuese në botë ka hyrë në fazën më intensive, ndërsa kompania sllovake Klein Vision ka publikuar pamje të reja të modelit të tyre revolucionar, AirCar. Sipas njoftimeve zyrtare, makina fluturuese pritet të dalë në treg në janar të vitit 2026 me një çmim rreth 800,000 dollarë.

Klein Vision është zhvilluesi i parë i certifikuar për fluturim, duke arritur një tjetër hap drejt realizimit të ëndrrës për mjetet që kombinojnë vozitjen dhe fluturimin. AirCar ka përfunduar me sukses 170 orë fluturimi, duke kryer mbi 500 ngritje dhe ulje në testimet e tij intensive.

Përveç këtyre rezultateve, makina ka një rreze fluturimi prej 620 miljesh dhe një shpejtësi maksimale fluturimi prej 250 km/orë, duke e bërë atë një kandidat serioz në tregun e teknologjive të transportit të ardhshëm.

Kjo iniciativë ngre një etapë të re në industrinë e automjeteve, duke sfiduar kufijtë e teknologjisë dhe duke premtuar të sjellë një revolucion në mënyrën se si udhëtojmë. AirCar pritet të jetë vetëm fillimi i një epoke të re ku makina dhe avioni bashkohen në një mjet unik.