Në një komunikim për mediat, ministri i Drejtësisë Ulsi Manja ka bërë të ditur se burgu i Pogradecit pritet të përfundojë në mars dhe do të ofrojë kushte optimale për të dënuarit. Ministri gjithashtu ka nënvizuar synimin për zhvendosjen e burgut të grave në Pogradec, por ka shtuar se kjo do të ndodhë vetëm pas amnistisë penale.

Manja ka thënë: “Është diskutuar zhvendosja në Pogradec, ai institucion është drejt përfundimit të mobilimit dhe e kemi marrë në dorëzim brenda marsit përfundon me çelësa në dorë mobilimi i brendshëm. Kemi marrë edhe vlerësim të avokates se popullit në lidhje me standardet e atij institucioni, dhe besoj shpejt do të kemi një vendimmarrje për transferimin, por do të jetë pasi të bëhet amnistia.”

Ai ka gjithashtu theksuar se pas transferimit të grave, burgu do të jetë i hapur dhe do të ofrojë mundësi për të dënuarit që kanë mbetur 6 muaj para se të bashkohen me familjet e tyre. Ministri ka shpjeguar se ky model do të ndihmojë në zbatimin e ligjit për burgjet e hapura dhe ka shtuar se ata janë në konsultim me drejtorinë e burgjeve dhe ekspertët për të gjetur zgjidhje për sistemin e burgjeve në Shqipëri. Manja ka përfunduar duke premtuar miratimin e shpejtë të masterplanit të zhvillimit të institucioneve burgjore deri në vitin 2030 dhe gradualisht mbylljen e burgjeve të trashëguara nga koha e komunizmit.