Deputetja demokrate e qarkut Durrës, Manjola Luku, ngriti akuza të forta ndaj qeverisë gjatë protestës së tretë radhazi që organizohet para Kryeministrisë nga Foltorja. Në fjalën e saj, Luku deklaroi se opozita ka detyrimin moral të reagojë ndaj, sipas saj, skandaleve dhe abuzimeve që kanë tronditur institucionet shtetërore.

“Nuk jemi vetëm për miting politik, por edhe për t’i thënë ‘stop’ abuzimeve dhe për të ngritur zërin kundër ligjeve që shkatërrojnë familjet tona dhe moralin kombëtar,” tha deputetja demokrate, duke nënvizuar se ngjarjet e fundit kriminale në vend përfaqësojnë “jo vetëm rënie të shtetit, por edhe dhunë të vetë shtetit të lidhur me bandat”.

Ajo përmendi atentatet e ndodhura së fundmi në Rinas dhe Elbasan, duke i cilësuar tregues të situatës së rëndë të sigurisë në vend.

Luku iu referua gjithashtu aferave të fundit që përfshijnë zëvendëskryeministren Belinda Balluku, duke pretenduar se bisedat e publikuara tregojnë mënyrën se si shpërndahen tenderat dhe favorizimet në projekte publike.

Në përfundim të fjalës, Luku kërkoi dorëheqjen e qeverisë Rama dhe vijimin e protestave deri në largimin e saj, duke theksuar se “heshtja nuk është më një opsion për opozitën”.