Qarku i Los Angeles ka miratuar një marrëveshje rekord prej 4 miliardë dollarësh për të kompensuar rreth 7,000 viktima të abuzimeve seksuale që kanë ndodhur në qendrat e të miturve dhe institucionet e kujdesit të drejtuara nga autoritetet lokale, në një nga rastet më tronditëse të keqtrajtimit institucional në historinë amerikane.

Shumica e rasteve kanë ndodhur në qendrën MacLaren, një institucion i hapur në vitin 1961 dhe i mbyllur në 2003, ku sipas dëshmive, fëmijët dhe të miturit janë përballur me abuzim seksual, dhunë fizike, kërcënime dhe heshtje institucionale që ka zgjatur për dekada.

Një raport zyrtar ka zbuluar se në këto qendra ishin punësuar persona me precedentë penalë, ndërkohë që drejtësia penale ka mbetur prapa: asnjë person nuk është arrestuar deri tani, edhe pse disa raste janë referuar për hetim.

Jimmy Vigil, një nga të mbijetuarit, tha se marrëveshja nuk e sjell drejtësinë e vërtetë: “Ajo do të ishte ndjekja penale e abuzuesve. Ne ishim fëmijë. Sistemi nuk na mbrojti, na dënoi.”

Mbikëqyrësja e qarkut Kathryn Barger e quajti këtë një “kapitull të errët në historinë tonë”, ndërsa autoritetet premtuan masa reformuese, përfshirë krijimin e një linje të dedikuar për raportim abuzimesh dhe përshpejtimin e hetimeve ndaj punonjësve të dyshuar.

Kompensimi do të shpërndahet deri në vitin 2050, dhe financimi i tij do të mbulohet përmes rezervave financiare, emetimit të obligacioneve dhe shkurtimeve buxhetore në disa sektorë të administratës së qarkut, i cili ka një buxhet vjetor prej 48 miliardë dollarësh.

Sipas avokatëve që përfaqësuan viktimat, kjo marrëveshje u bë e mundur falë kurajos së të mbijetuarve dhe një ndryshimi ligjor në Kaliforni në vitin 2020, që lejoi ngritjen e padive edhe për raste të vjetra abuzimi.

Drejtuesit e qarkut e përshkruajnë këtë si një përpjekje për të njohur dëmet e thella të së kaluarës dhe për të nisur një epokë të re në mbrojtjen e të miturve në sistemin publik të Kalifornisë.