Komisionerja e Bashkimit Evropian për Zgjerim, Marta Kos, është shprehur e bindur se gjatë mandatit të saj do të ketë anëtarë të rinj në BE. Sipas saj, nëse kjo nuk ndodh, atëherë mandati i saj do të konsiderohej si një dështim.

Në një intervistë për *Radion Evropa e Lirë*, Kos theksoi se pret që Mali i Zi të anëtarësohet deri në fund të vitit 2026, dhe Shqipëria deri në fund të vitit 2027.
“Mund të përfundojmë me Malin e Zi si anëtar deri në fund të vitit 2026, dhe me Shqipërinë deri në fund të vitit 2027,” u shpreh ajo.

Në lidhje me Serbinë, komisionerja vuri në pikëpyetje seriozitetin e këtij vendi për anëtarësim në BE. Ajo tha:
“Më pëlqen të them që jam mbështetësja më e madhe e protestuesve, sepse nëse Serbia është serioze për rrugën drejt BE-së, atëherë duhet të japë rezultate.”

Në fokus të intervistës ishte gjithashtu edhe normalizimi i marrëdhënieve mes Kosovës dhe Serbisë, si një parakusht i domosdoshëm që Kosova të fitojë statusin e vendit kandidat për BE dhe të nisë procesin e anëtarësimit.
“Ne po presim për formimin e qeverisë së re në Kosovë. Jam në kontakt me politikanët atje dhe ata pretendojnë se janë shumë në favor të normalizimit të marrëdhënieve me Serbinë, çka është parakusht që të mund të nisë procesi i negociatave ose të jepet statusi i kandidatit,” deklaroi Kos.

E pyetur nëse Bashkimi Evropian do të heqë masat e vendosura ndaj Kosovës, Komisionerja Kos tha:
“Jemi duke e diskutuar këtë çështje. Nëse shtetet anëtare do të jenë dakord për heqjen e tyre, sigurisht që do ta bëjmë këtë. Por, për momentin, jo të gjitha shtetet anëtare janë për heqjen e masave.”