Në Arizona janë marrë masa të rrepta sigurie për zgjedhjet presidenciale të cilat zhvillohen sot në SHBA, ku qytetarët do të zgjedhin presidentin e ri mes Kamala Harris dhe Donald Trump. Siguria në qendrën e numërimit të votave është e ngjashme me atë në aeroporte apo edhe në burgje. Për të garantuar një proces të qetë, janë përgatitur plane për rritjen e mëtejshme të sigurisë nëse është e nevojshme, duke përfshirë dronë, oficerë të policisë me kalë dhe snajperë të pozicionuar në çati, sipas raportimeve të BBC.

Qendra e votimit është e mbuluar me kamera sigurie dhe e rrethuar nga një gardh i dyfishtë për të mbrojtur stafin nga çdo formë ngacmimi ose kërcënimi jashtë ndërtesës. Këto masa shtesë janë ndërmarrë për të siguruar mbarëvajtjen e procesit të votimit dhe për të mbrojtur punonjësit që po merren me numërimin e fletëve të votimit.