Të paktën 67 palestinezë janë vrarë dhe dhjetëra të tjerë janë plagosur në një nga ngjarjet më të rënda të dhunës ndaj civilëve në muajt e fundit në Rripin e Gazës. Masakra ndodhi në zonën al Sudaniya, në veri të territorit, ku qindra njerëz ishin mbledhur për të marrë ndihma humanitare.

Sipas zyrtarëve të spitalit al Shifa, 45 trupa pa jetë janë sjellë vetëm në ambientet e këtij spitali, ndërsa tre spitale të tjera në zonë raportuan për shumë viktima të tjera.

Burime mjekësore lokale thanë se kjo është vetëm një prej disa ngjarjeve të ngjashme që kanë ndodhur në javët e fundit, ku qindra civilë janë vrarë ndërsa prisnin ndihma ushqimore ose përpiqeshin të largoheshin nga zonat e luftimeve.

Vetëm të shtunën, forcat izraelite u akuzuan për vrasjen e të paktën 32 palestinezëve në zonën Teina, duke përforcuar akuzat për përdorim të tepruar të forcës ndaj popullsisë civile.

Ndërkohë, ushtria izraelite ka lëshuar urdhra për evakuim masiv në qendër të Gazës, përfshirë Deir al Balah, një nga zonat ku janë strehuar mijëra palestinezë të zhvendosur nga luftimet në veri dhe jug. Kjo ka ngjallur frikë për një ofensivë të re tokësore, e cila mund të përkeqësojë më tej gjendjen tashmë katastrofike humanitare.

Ndërkohë, familjet e pengjeve izraelite, që ndodhen ende në Gaza, kanë shprehur shqetësime të thella se të afërmit e tyre mund të gjenden pikërisht në zonat e rrezikuara nga bombardimet dhe operacionet ushtarake.

Situata humanitare në Gaza përshkruhet si jashtëzakonisht kritike: mungesë e thelluar e ushqimit, ujit të pijshëm, energjisë dhe kujdesit shëndetësor. Organizatave humanitare po u bëhet gjithnjë e më e vështirë të aksesojnë zonat në nevojë, ndërsa komuniteti ndërkombëtar vazhdon të bëjë thirrje për një armëpushim urgjent dhe qasje të pakushtëzuar humanitare.