Një skemë mashtrimi në rritje në WhatsApp, e njohur si “Hi Mum” scam, ka alarmuar ekspertët e sigurisë kibernetike, të cilët paralajmërojnë përdoruesit për rreziqet e reja që vijnë tashmë të përforcuara me inteligjencë artificiale. Sipas mediave ndërkombëtare, vetëm gjatë vitit 2025, kjo skemë ka mashtruar qytetarë në Mbretërinë e Bashkuar me mbi 490 mijë paund.

Mashtrimi funksionon në mënyrë shumë të thjeshtë, por të sofistikuar: viktima merr një mesazh në WhatsApp me përshëndetjen “Hi Mum” ose “Hi Dad”, që pretendon të vijë nga një fëmijë apo familjar që ka humbur telefonin dhe nuk ka akses në llogaritë bankare. Pasi fiton besimin e prindit apo të afërmit, mashtruesi kërkon para – shpesh për qira, një telefon të ri, apo ndonjë urgjencë tjetër të sajuar.

Risia shqetësuese është përdorimi i teknologjisë AI për të imituar zërin e fëmijëve. Mashtruesit marrin materiale audio nga videot apo postimet e të rinjve në rrjetet sociale dhe i përdorin për të ndërtuar mesazhe zanore bindëse. Sipas ekspertit të sigurisë Jake Moore, kjo formë manipulimi është aq e sofistikuar, saqë edhe nëna e tij nuk e kuptoi që ishte zë i gjeneruar me AI.

“Ky është një hap i rrezikshëm përpara për mashtruesit. Nëse më parë dyshoja kur merrja mesazhe me tekst, tani mund të dëgjosh zërin e dikujt që njeh – dhe të biesh pre më lehtë,” shprehet Moore për median britanike.

Mashtrimi nuk kufizohet më vetëm te “Hi Mum”. Sulmuesit mund të paraqiten si djem, vajza, nipa, mbesa apo edhe miq të afërt, duke përdorur informacione të marra nga Facebook, Instagram apo TikTok, për të krijuar histori sa më të besueshme.

Ekspertët këshillojnë që përdoruesit të mos transferojnë kurrë para bazuar vetëm në një mesazh ose telefonatë, pa verifikuar drejtpërdrejt identitetin e personit tjetër. Nëse merrni një mesazh të dyshimtë, telefononi në një numër të njohur për të konfirmuar situatën, dhe mos ndani asnjëherë të dhëna bankare në biseda të paautorizuara.

Autoritetet ndërkombëtare të sigurisë digjitale vazhdojnë hetimet për identifikimin e grupeve kriminale pas këtij mashtrimi, ndërkohë që thirrjet për vetëdijësim dhe mbrojtje personale ndaj teknologjive të reja vazhdojnë të rriten.